ខ្លាំងមែន! បិទមេរោគ​កុំព្យូទ័រកំពុង​ល្បីបាន ហើយ​ឲ្យ​ប្រាក់​មិន​យក​ទៀត

យុវជន​មកពី​ចក្រភព​អង់គ្លេស​ម្នាក់ ដែល​មិន​​បញ្ចេញ​ឈ្មោះ ​ទទួល​​បាន​ប្រាក់​រង្វាន់​ចំនួន ១ម៉ឺន​ដុល្លារ​អាមេរិក បន្ទាប់ពី​​បាន​ទប់ស្កាត់​ការ​រីក​រាលដាល​នៃ​មេរោគ​ WannaCry កាលពី​ចុង​សប្ដាហ៍​កន្លងទៅ។ យុវជន​វ័យ ២២​ឆ្នាំ​រូបនេះ បាន​ប្រាប់​ដល់​ Business Insider ថា «ខ្ញុំ​មិនមែន​ធ្វើ​វា​ដើម្បី​ប្រាក់ ឬ កេរ្តិ៍ឈ្មោះ​នោះទេ... ខ្ញុំ​នឹង​ជូន​ប្រាក់​ទាំង​នេះ សម្រាប់​មនុស្ស​ដែល​ត្រូវ​ការ​វា​វិញ»។

 យុវជន​វ័យ ២២ឆ្នាំ​ដែល​មិន​បាន​បង្ហាញ​ឈ្មោះ​ជា​សាធារណៈ​រូប​នេះ ជា​ម្ចាស់​គេហទំព័រ​ឈ្មោះ “MalwareTech” ដែល​បាន​ស៊ើបអង្កេត​ស្វែងរក​កូដ​របស់​មេរោគ​ខាងលើ ដើម្បី​បញ្ឈប់​ការ​វាយប្រហារ កាលពី​សប្ដាហ៍​មុនដែល​បាន​កើតឡើង​នៅ​ជាង ១៥០​ប្រទេស។ ការ​ដែល​មិន​បញ្ចេញ​ឈ្មោះ​នេះ​ដែរ ព្រោះ​អាច​ជា​កត្តា​សុវត្ថិភាព​សម្រាប់​រូបគេ​ផង​ដែរ។
ចំពោះ​ប្រាក់​រង្វាន់​ត្រូវ​បាន​ផ្ដល់​ជូន​ដោយ HackerOne ជា​អង្គភាព​មួយ​សម្រាប់​ឲ្យ​អ្នក​ស្រាវជ្រាវ​ផ្នែក​សន្តិសុខ​នានា បាន​រាយការណ៍​នូវ​បញ្ហា​មួយ​ចំនួន​នៅ​ក្នុង Software និង​ដើម្បី​តបស្នង​វិញ​ជា​ប្រាក់​រង្វាន់។ HackerOne ក៏​បាន​ចេញ​សេចក្ដី​ថ្លែង​អំណរគុណ​ដល់ MalwareTech ដែល​បាន​រួមចំណែក​ជួយ​ឲ្យ​ប្រព័ន្ធ​អ៊ីនធឺណិត កាន់តែ​មាន​សុវត្ថិភាព​បន្ថែម​ទៀត​៕