អ្នកនាំពាក្យរាជរដ្ឋាភិបាលបដិសេធព័ត៌មានចចាមអារ៉ាមស្តីពីការផ្លាស់ប្តូររដ្ឋមន្ត្រីក្រសួងចំនួន៤

(ភ្នំពេញ)៖ អ្នកនាំពាក្យរាជរដ្ឋាភិបាល បានធ្វើការបដិសេធចោលចំពោះពាក្យចចាមអារ៉ាមអំពីការផ្លាស់ប្តូររដ្ឋមន្ត្រីចំនួន០៤រូបគឺរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ រដ្ឋមន្ត្រីទីស្តីការគណៈរដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងក្រសួងអប់រំ យុវជន និងកីឡា។

ការបដិសេធនេះ គឺបន្ទាប់ពីបណ្តាញសារព័ត៌មានក្នុងស្រុកមួយចំនួនបានចុះផ្សាយ និងការនិយាយតៗគ្នាពីមាត់មួយទៅមាត់មួយ អំពីការផ្លាស់ប្តូររដ្ឋមន្ត្រីចំនួន០៤ ខខាងលើនេះ។

លោកផៃ ស៊ីផាន អ្នកនាំពាក្យរាជរដ្ឋាភិបាលបានមានប្រសាសន៍ប្រាប់រស្មីកម្ពុជា ឲ្យដឹងថា ចំពោះការផ្លាស់ប្តូរនេះគឺមានតែសម្តេចតេជោ ហ៊ុន សែន នាយករដ្ឋមន្ត្រី ទេ ដែលដឹង។ ដោយលោកបានបញ្ជាក់ថា អត់មានអីផ្លាស់ប្តូរទេ ហើយដំណឹងដែលថាមានការផ្លាស់ប្តូរនេះ គឺជារឿងចចាមអារ៉ាម ហើយផ្លូវការទាល់តែសម្តេចតេជោនាយករដ្ឋមន្ត្រី ហ៊ុន សែន ផ្ញើលិខិតរដ្ឋសភា។

សារព័ត៌មានក្នុងស្រុកមួយចំនួនបានផ្សាយថា រដ្ឋមន្ត្រីក្រសួងចំនួន០៤រូប នឹងអាចត្រូវផ្លាស់ប្តូរមានដូចជា៖

១. លោកទេសរដ្ឋមន្ត្រី ប្រាក់ សុខុម រដ្ឋមន្ត្រីក្រសួងការបរទេស និងសហប្រតិបត្តិអន្តរជាតិ នឹងអាចប្តូរទៅកាន់ជារដ្ឋមន្ត្រីទទួលបន្ទុកទីស្តីការគណ:រដ្ឋមន្ត្រី ជំនួស សម្តេចវិបុលបញ្ញា សុខ អាន ដែលទទួលមរណៈភាព។

២. លោក អ៊ូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នឹងអាចប្តូរទៅកាន់ជារដ្ឋមន្ត្រី ក្រសួងការបរទេសនិងសហប្រតិបត្តិអន្តរជាតិ ជំនួសលលោកទេសរដ្ឋមន្ត្រី ប្រាក់ សុខុន ។

៣. លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា នឹងអាចប្តូរទៅកាន់ជារដ្ឋមន្ត្រី ក្រសួងសេដ្ឋកិច្ច និងហិរញ្ញវត្ថុ ជំនួសលោក អ៊ូន ព័ន្ធមុនីរ័ត្ន ។

៤. លោក ហ៊ុន ម៉ានី តំណាង រាស្ត្រមណ្ឌលកំពង់ស្ពឺ នឹងអាចទៅកាន់ជារដ្ឋមន្ត្រីក្រសួងអប់រំ យុវ ជន និងកីឡាជំនួសលោក ហង់ ជួនណារ៉ុន៕