គ្រូឥណ្ឌា បើខ្ញុំជាគ្រូថ្មីកម្ពុជា កូនក្រុមលេងល្អប៉ុណ្ណឹង គឺអស្ចារ្យណាស់ហើយ

លោក Stephen Constantine គ្រូបង្វឹកក្រុមជម្រើសជាតិឥណ្ឌា សរសើរការលេងរបស់កម្ពុជា ហើយលោកថាប្រសិនបើជាគ្រូបង្វឹកក្រុមនេះវិញ នឹងសប្បាយចិត្តចំពោះលទ្ធផលដែលចាញ់ឥណ្ឌាត្រឹម ២-៣នេះ។

ក្រុមគោព្រៃកម្ពុជា បានបរាជ័យប្រកួតបើកឆាករដូវកាលថ្មីរបស់ខ្លួន ក្នុងការប្រកួតមិត្តភាពអន្តរជាតិ CLEAR ជាមួយក្រុមឥណ្ឌា ២-៣ កាលពីយប់មិញនេះ ក្រោមក្រសែភ្នែកអ្នកគាំទ្ររាប់ម៉ឺននាក់។ យ៉ាងណាមិញ ទោះជាលទ្ធផលមិនទាន់ល្អដល់អ្វីដែលអ្នកគ្រប់គ្នាចង់បានមែន ប៉ុន្តែចង្វាក់លេងថ្មីក្រោមការដឹកនាំរបស់លោក Leonardo Luiz ពិតជាធ្វើឱ្យអ្នកទស្សនា និងអ្នកស្នេហាវិស័យបាល់ទាត់ពិតៗ ជក់ចិត្តមែនទែន ទាំងការលេងបាល់ក្រោម និងការលេងបាល់ខ្លីៗ។

ដូចគ្នានេះដែរ ទម្រង់លេងល្អរបស់កម្ពុជានេះ លោក Stephen Constantine គ្រូបង្វឹកក្រុមជម្រើសជាតិឥណ្ឌា ពិតជាកោតសរសើរមែន។ ត្បិតអីការចូលដឹកនាំទើបតែបានប៉ុន្មានថ្ងៃ តែលោក Leo បាននាំក្រុមកម្ពុជាឆ្ពោះទៅរកទម្រង់លេងមួយដែលអស្ចារ្យ។ ដោយឡែកបើលោកជាគ្រូបង្វឹកកម្ពុជាវិញ លទ្ធផលប៉ុណ្ណឹងលោកពិតជាសប្បាយចិត្តណាស់ហើយ៕