ស្គាល់អត្តសញ្ញាណអ្នកដំណើរអាស៊ីគេទាញចេញពី​យន្តហោះ United ហើយ

អ្នក​ដំណើរ​អាស៊ី​ម្នាក់ ​ត្រូវ​បាន​បុគ្គលិក​យន្តហោះ​អាមេរិក United Airlines ​ទាញ​ចេញ​ពី​កៅអី​អង្គុយ​​​របស់​ខ្លួន​ និង​ធ្វើ​ឲ្យ​ល្បី​ស្ទើរ​ជុំវិញ​ពិភព​លោក​​កាល​ពី​​ថ្ងៃ​ម្សិលមិញ ពេល​នេះ​គេ​ស្គាល់​អត្តសញ្ញាណ​ហើយ។

លោក​​ឈ្មោះ David Dao មាន​អាយុ ៦៩​ឆ្នាំ ជា​ជនជាតិ​វៀតណាម-អាមេរិក​ និង​ជា​វេជ្ជបណ្ឌិត​​ជំនាញ​​ឱសថ​យូរ​ឆ្នាំ​ម្នាក់​។ លោក​ត្រូវ​បាន​គេ​វាយ​ឈាម​​មុខ រួច​ទាញ​ចេញ​ពី​យន្តហោះ​​ដោយសារ​ក្រុមហ៊ុន​ទទួល​កក់​សំបុត្រ​លើស​ចំនួន​​កំណត់​នៅ​អាកាសយានដ្ឋាន O'Hare ទីក្រុង​ឈីហ្កាហ្គូ បង្ក​ឲ្យ​​ផ្ទុះ​កំហឹង​ពី​​មនុស្ស​ជា​ច្រើន។
នៅ​ក្នុង​វីដេអូ​​បង្ហោះ​លើ​បណ្ដាញ​សង្គម​ម្សិលមិញ គេ​បាន​ឮ​លោក Dao ​និយាយ​ថា​ គាត់​ត្រូវ​ទៅ​កាន់​ទីក្រុង Louisville ​ដើម្បី​ទៅ​ជួប​អ្នក​ជំងឺ ខណៈ​បុគ្គលិក​យន្តហោះ​ទាញ​គាត់​ចេញ។
តាម​ប្រភព​ដេលី ម៉េល បង្ហើប​ថា​ លោក​វេជ្ជបណ្ឌិត Dao ជា​ឪពុក​មាន​កូន​ ៥​នាក់ ​និង​មាន​ចៅ​​ជាច្រើន​ផ្សេ​ង​ទៀត ហើយ​កូន​ទាំង ​៥​នាក់ មាន​ ៤​នាក់​ជា​វេជ្ជបណ្ឌិត​អស់​ហើយ។ ចំណែក​ភរិយា​​របស់​លោក​​​ជា​ជនជាតិ​អាមេរិកមាន​ឈ្មោះ Teresa អាយុ ៦៩​ ឆ្នាំ​ដូច​គ្នា​ និង​ជា​ពេទ្យ​ផ្នែក​កុមារ​ធ្លាប់​ទទួល​ការ​សិក្សា​នៅ​សាកល​វិទ្យាល័យ​ហូជីមិញ ក្នុង​ទីក្រុង​សាយហ្គន រួច​ទៅ​បម្រើ​ការ​នៅ​ទីក្រុង Elizabethtown, Kentucky ​នៅ​ភាគ​ខាង​ត្បូង​ទីក្រុង Louisville។
កូន​បង​គេ​មាន​ឈ្មោះ Tim អាយុ ៣៤​ឆ្នាំ ​កំពុង​ធ្វើ​ការ​ខាង​ឱសថ​​នៅ​រដ្ឋតិច​សាស់។ កូន​ទី ២​​ឈ្មោះ Ben អាយុ ៣១​ឆ្នាំ ខាង​ឱសថ​ដូច​គ្នា។ កូន​ស្រី​ទី ៣ ​ឈ្មោះ Christine អាយុ ៣៣ឆ្នាំ​ ជា​វេជ្ជបណ្ឌិត​ជំងឺ​ទូទៅ​បម្រើ​ការ​នៅ​ក្រុង​ញូវយ៉ក និង​កូន​ស្រី​ពៅ​គេ​ឈ្មោះ Angela អាយុ ២៧​ឆ្នាំ​បញ្ចប់​ការ​សិក្សា​ផ្នែក​ឱសថ​​នៅ​សាកល​វិទ្យាល័យ Kentucky។
ងាក​ទៅ​មើល​រឿងរ៉ាវ​របស់​លោក​វិញ ពេល​នេះ​វេជ្ជបណ្ឌិត​រង​គ្រោះ​បាន​ជួល​មេធាវី​ចំនួន ២​រូប ដើម្បី​ប្ដឹង​តវ៉ា​ខាង​ក្រុម​​ហ៊ុន​អាកាសចរណ៍​វិញ ទោះ​ក្រុម​ហ៊ុន​​បាន​សុំ​ទោស​​ភ្លាម​ៗ​ក៏​ដោយ ចំណែក​​នាយក​​ប្រតិបត្តិ​​ក្រុម​ហ៊ុន​​​លោក Oscar Munoz បាន​ការ​ពារ​បុគ្គលិក​ខ្លួន​ដោយ​ហៅ​ជន​រងគ្រោះ​​ជា​មនុស្ស​​ឆាឆៅ និង​ក្បាល​រឹង៕